సమాజ చైతన్యమే జీవిత లక్ష్యం.. సేవే శ్వాసగా సాగిన ప్రస్థానం!
ఏడు పదుల వయసులోనూ ప్రజల పక్షాన కలం.. కళ.. కార్యాచరణ
నిస్వార్థ సేవకు నిలువెత్తు నిదర్శనం డా. వల్లంపట్ల నాగేశ్వర్‌రావు
సామాజిక రుగ్మతలపై అక్షరాయుధం.. ప్రజల్లో చైతన్యానికి కళారూపాలు
జాతీయ ఉత్తమ ఉపాధ్యాయ అవార్డుతో జాతీయ స్థాయిలో గుర్తింపు
సప్తతి ముగింపు వేడుకలకు కాళోజీ కళాక్షేత్రం వేదిక
నవంబర్‌ 15న ‘తలకొరివి’ నాటిక ప్రదర్శన..
అక్ష‌ర‌శ‌క్తి, హనుమకొండ: సమాజం కోసం బతకడం కొందరి నినాదం.. మరికొందరి జీవిత విధానం. తన అక్షరంతో ఆలోచింపజేస్తూ.. తన కళతో కదిలిస్తూ.. తన ఆచరణతో మార్పునకు బాటలు వేస్తూ ఏడు దశాబ్దాల జీవితాన్ని ప్రజా చైతన్యానికి అంకితం చేసిన వ్యక్తిత్వం డా. వల్లంపట్ల నాగేశ్వర్‌రావుది. పదవులు, పురస్కారాల కోసం కాకుండా సమాజంలోని అసమానతలు, మూఢనమ్మకాలు, వివక్ష, అన్యాయాలపై ప్రజల్లో అవగాహన కల్పించాలనే సంకల్పంతో ఆయన సాగించిన ప్రస్థానం స్ఫూర్తిదాయకం. ఉపాధ్యాయుడిగా విద్యార్థుల భవిష్యత్తుకు బాటలు వేసి.. ప్రజాకళాకారుడిగా సామాజిక సమస్యలను కళారూపాల్లో ఆవిష్కరించి.. రచయితగా తన కలాన్ని ప్రజల గొంతుకగా మలిచిన ఆయన సేవా ప్రయాణానికి నవంబర్‌ 15న కాళోజీ కళాక్షేత్రంలో సప్తతి ముగింపు ఉత్సవం వేదిక కానుంది.
బోధనకే పరిమితం కాని ఉపాధ్యాయ ప్రస్థానం
ఉపాధ్యాయ వృత్తిని కేవలం పాఠాలు చెప్పే బాధ్యతగా కాకుండా సమాజ నిర్మాణంలో కీలకమైన పాత్రగా భావించిన వ్యక్తి వల్లంపట్ల నాగేశ్వర్‌రావు. విద్యార్థుల్లో చదువుతోపాటు సామాజిక బాధ్యత, మానవీయ విలువలు, ప్రశ్నించే తత్వం పెంపొందించాలనే తపనతో పనిచేశారు. తరగతి గది గడప దాటి సమాజంలోకి వెళ్లి ప్రజల సమస్యలను అర్థం చేసుకోవడం, వాటిపై చర్చకు వేదికలు కల్పించడం ఆయన కార్యాచరణలో భాగమైంది. విద్యారంగానికి, సమాజానికి చేసిన సేవలకు గుర్తింపుగా జాతీయ ఉత్తమ ఉపాధ్యాయ అవార్డును అందుకున్నారు. ఆ పురస్కారం ఆయన వ్యక్తిగత ప్రతిభకు మాత్రమే కాకుండా విద్యను సామాజిక మార్పుకు సాధనంగా మలిచిన కృషికి లభించిన గౌరవంగా నిలిచింది.
కళను చైతన్య ఉద్యమంగా మలిచి..
సమాజంలోని సమస్యలను ప్రజలకు చేరవేయడానికి కళకంటే ప్రభావవంతమైన మాధ్యమం మరొకటి లేదనే నమ్మకంతో వల్లంపట్ల తన రచనలు, ప్రజా కళారూపాల ద్వారా చైతన్య కార్యక్రమాలకు శ్రీకారం చుట్టారు. సామాన్యుల జీవితాల్లో ఎదురయ్యే సంఘర్షణలు, కుటుంబ వ్యవస్థలోని సమస్యలు, సామాజిక బాధ్యతలు, మానవ సంబంధాల్లోని విలువలను తన సృజనలో ప్రతిబింబించారు. వినోదాన్ని అందించడమే కళ లక్ష్యం కాదని, ఆలోచన రేకెత్తించి సమాజాన్ని సరైన దిశలో నడిపించడమే కళకు అసలైన ప్రయోజనమని తన రచనల ద్వారా చాటిచెప్పారు. అహర్నిశలు శ్రమిస్తూ తన జీవితాన్ని సామాజిక చైతన్య కార్యక్రమాలకు అంకితం చేశారు.
‘తలకొరివి’లో సామాజిక సందేశం
వల్లంపట్ల నాగేశ్వర్‌రావు రచించిన ‘తలకొరివి’ నాటిక సప్తతి ముగింపు ఉత్సవాల్లో ప్రత్యేక ఆకర్షణగా నిలవనుంది. మాలి విజయ్‌రాజ్ దర్శకత్వంలో ఈ నాటికను ప్రదర్శించనున్నారు. నాటకం ద్వారా ప్రేక్షకులను ఆలోచింపజేసి, సమాజం ఎదుర్కొంటున్న అంశాలపై చర్చకు దారితీయాలన్న రచయిత ఆకాంక్ష ఈ ప్రదర్శనలో ప్రతిఫలించనుంది. ఒక రచయిత తన ఆలోచనలను పుస్తకాల్లోనే పరిమితం చేయకుండా రంగస్థలంపైకి తీసుకువచ్చి ప్రజల ముందుంచడం ద్వారా కళను సామాజిక సంభాషణకు వేదికగా మలుస్తున్నారు. అందుకే ఈ నాటిక ప్రదర్శన సప్తతి వేడుకల్లో ప్రధాన ఘట్టంగా మారనుంది.
పురస్కారాలకంటే ప్రజల ఆదరణే అసలైన గుర్తింపు
సమాజకవి, ప్రజాకళాకారుడు, సంఘసేవకుడిగా వల్లంపట్ల నాగేశ్వర్‌రావు సాగించిన ప్రస్థానంలో ఎన్నో అవార్డులు, సత్కారాలు భాగమయ్యాయి. అయితే ఆయన కృషిలో ప్రధానంగా కనిపించేది గుర్తింపు కోసం ఎదురుచూడని నిస్వార్థ సేవాభావం. తనకు తెలిసిన విద్యను, కళను, రచనా సామర్థ్యాన్ని ప్రజల కోసం వినియోగించాలనే తపన ఆయనను నిరంతరం కార్యాచరణలో ఉంచింది. సమాజంలో మార్పు ఒక్కరోజులో రాదని, అందుకు నిరంతర ప్రయత్నం, ప్రజల భాగస్వామ్యం అవసరమని ఆయన ప్రయాణం తెలియజేస్తోంది. వ్యక్తిగత విజయాలకంటే సమాజానికి ఉపయోగపడే పనులకే ప్రాధాన్యమిచ్చిన ఆయన జీవన విధానం నేటి తరానికి ఆదర్శంగా నిలుస్తోంది.
ప్రముఖుల సమక్షంలో సప్తతి ముగింపు వేడుకలు
నవంబర్‌ 15న సాయంత్రం 6 గంటలకు హనుమకొండలోని కాళోజీ కళాక్షేత్రంలో వల్లంపట్ల నాగేశ్వర్‌రావు సప్తతి ముగింపు ఉత్సవాలు నిర్వహించనున్నారు. ముఖ్య అతిథిగా రాష్ట్ర పంచాయతీరాజ్‌, గ్రామీణాభివృద్ధి, స్త్రీ శిశు సంక్షేమ శాఖ మంత్రి డా. దనసరి అనసూయ (సీతక్క) పాల్గొననున్నారు. విశిష్ట అతిథులుగా వరంగల్‌ ఎంపీ డా. కడియం కావ్య, ఎమ్మెల్యేలు కడియం శ్రీహరి, నాయిని రాజేందర్‌రెడ్డి, కె.ఆర్‌. నాగరాజు, గండ్ర సత్యనారాయణరావు హాజరుకానున్నారు. గౌరవ అతిథులుగా హనుమకొండ కలెక్టర్‌ చాహత్‌ బాజ్‌పాయ్‌, వరంగల్‌ కలెక్టర్‌ డా. సత్యశారద పాల్గొంటారు. ఆత్మీయ అతిథులుగా తెలుగు అకాడమీ చైర్మన్‌ ప్రొఫెసర్‌ కూరపాటి వెంకటనారాయణ, రాష్ట్ర గ్రంథాలయ సంస్థ చైర్మన్‌ డా. ఎం.డి. రియాజ్‌, కేంద్ర సాహిత్య అకాడమీ అవార్డు గ్రహీత డా. అంపశయ్య నవీన్‌, ప్రొఫెసర్‌ బన్న అయిలయ్య, మేన శ్రీను, డా. మార్త రమేష్‌ తదితరులు పాల్గొననున్నారు. ఈ సందర్భంగా నాటకరంగ సీనియర్‌ ప్రముఖులు శ్రీరామోజు సుందరమూర్తి, బోయినపల్లి పురుషోత్తంరావు, డా. పెద్ది వెంకటయ్య, దివంగత తుపాకుల మొగిలయ్యలకు పురస్కారాలతో సన్మానం చేయనున్నారు.
